Sunday, April 14, 2024

Tagpuan at Buod ng mga Pulo

ni Keisiah Dawn Tiaoson | Marso 17, 2023

Paano hinubog ang pagsintang

Kaakibat ang walang hanggan?

Maaring hubog sa mga matang nangungulila sa kumot

O buhat ng mga labing nakasimangot —

Ngunit may kislap sa bawat sulyap

At indak sa bawat halik at yakap.

Wariin mang ika’y kayumangi’t ako’y maputi

O ako’y makata’t ika’y mang-aawit  —

Sa yaman nitong lahi, tayo’y iisa

Sa lawak nitong daigdig, karangalang ika’y makita.

Kuwento sa timog iyong binaon,

Epiko sa hilaga kaniyang ipinaksa.

Kendeng sa kanluran bukas ay hahatawin,

Dito sa silangan, bawat isa’y yayakapin.

Bagamat tayo’y iisa sa lahi’t, anak ni Ina,

Luha mo’y lungkot ko rin, maging tagumpay ko ay atin.

Mata mo’y salamin ng aking kaluluwa.

Higit ay ‘di nais kung kayo’y kinulang

At sa bagyo, sakuna’t unos,

Puso’y tumataba sa kaalamang —

Tiwasa’y ‘di nanaisin kung ako’y nanlilimos.

Tagpuan ng pulo ang pagbabayanihan, ang pagkaka-isa

Sa yaman nitong lahi, 

Katarungan, pagmamahal sa kapwa, at karampatan

Ang buod ng buong ikinalulugod.

LEAVE A REPLY

Please enter your comment!
Please enter your name here

Latest articles