Friday, March 29, 2024

Ang Paghilis sa Kadasig

by Emmarie Bonganciso | December 4, 2021

Kanus-a pa kaha
mabalik ang pagdilaab
sa akong gipanghandum
ug mabalik ang sidlak sa paglaum?

Sa mga lugar kung asa
una nako masayod ang kalipay,
wala ko na mabatyag ang pagbag-o
nga nagunitan ko pa ka niadto.

Kaniadto, kining mga dapita,
nabati ko pa ang kainit,
nakita ko pa ang kadasig.
Apan karon, dughan ko nagahuot.

Asa ko nasayop?
Diin man ni nagsugod?
Tanang paglutos, tanang kalisod,
nga diin ako nagpadayon sa pagpuangod?

Angay pa ba kong maglagot
sa banabana nakong nasayop;
sa akong pagtuong kaya nakong maako
ang tanang katungdanan, saad, ug trabaho?

Kanus-a pa kaha mabalik
ang ulbo sa kalayo
sa kadasig nga wala ko na namatikdan?
Dal-a ko balik sa lugar kung asa nagsugod ning tanan!

LEAVE A REPLY

Please enter your comment!
Please enter your name here

Latest articles