????????? ?? ??? ??????-???????

by Junelie Anthony Velonta | January 29, 2021

“Sorry for not bringing an interpreter but I think you already know why I’m here.”

Wala siya kasabot sa giingon sa kano, apan kahibaw siya nga isa ra nila ang mabiling buhi igkahuman aning ingkwentruha. Iyang gisuot iyang anting-anting ug habak. Human, nilingkod siya sa bangko duol sa ilahang talad-kan-anan—gitapot sa ubos niini ang pinuti nga iyang tinaguan.

Kahibaw siya nga siya ang mabuhi, nga siya ang mabilin. Pila na ka ingkwentro ang iyang naagian. Bisan pa og wala siya’y bala o pusil man, nabuhi siya ug nakapatay pa og pila, dala sa gahom sa iyahang anting-anting. Kaning kanoa isa ra kabuok. Mabuhi siya niini.

“I don’t have any intention to harm you and your family, as long as you come peacefully of course. Look, I’ve even left my saber by your door.”

Kabantay siya nga naa’y bulawan nga gitapot sa kwelyo sa uniporme sa kano. Taas kini’g ranko. Maayo. Dili na maglisod pa’g pangita niini ang iyahang mga kauban kung magpinusilay man ganing. Apan sa pagpatay niya nianing kanoa, kinahanglan sila sa iyahang pamilya mamalhin og lain nga lugar para dili sila mailhan. Bahala na.

Mintras naghunahuna siya, ang kano niduol ug nilingkod sa iyahang atbang, nisandig sa pader sa iyang likod—iyang tuo’ng kamot gapatong sa iyang hawak. Sa pagduol sa kano kay maabot na niya kini sa iyahang pinuti.

Sa iyang hunahuna, niampo siya og linatin nga wala niya nasabtan. Niginhawa siya’g lalom og katulo. Kunuhay daw nagyamyam siya nang niduko siya para mulili sa iyang tinaguang pinuti. Dihang iya kining gidali og bunot dayun siya nitindog para matigbas ang liog sa kano.

Apan naa’y nidunggab sa iyang dughan ug nituklod niya og kusog, nga siya nakalingkod balik dayun natumba paingon sa salog. Paghangad niya, kita siya’g gaaso sa may hawak sa kano.