ni Franciss Nikole Elli | May 24, 2021
Mi yahat tuy-od sa kakapoy,
Ilalom sa makapaso’ng udtong tutok.
Nidagayday ang singot sa kalawasan
Tungod sa kakapoy.
Naminhod ang duha ka tuhod
Samtang mga tiil nag-uga
Sa yuta’ng gibungkal ug gi-atiman.
Kini mao ang istorya sa usa ka mag-uuma.
Luyo sa kanunay nga pagkugi,
Sila gihapon ang mga tinamay.
Namulot sa ginagmay’ng mumho
Gi-usikan sa mga hakog nga adunahan.
Uban sa pagtikyop sa kahapunon,
Nidungo – yukbo pag usab ang tawo
Uban sa paghangad – pasalamat sa Makagagahom,
Nga ugma damlag makita ang tingusbawan.
