?? ??????? ??????? ??????? | March 12, 2021
Gimingaw ko sa
pagkalunhaw sa yutang tabunok,
ilalom sa anino
sa lasang nga pinutol
sa dalan nga pabukid.
Ang kaigang sa duol nga
tag-init, gipabugnaw ug gitan-og
sa hanging hinay nga
gahuyop, dala
ang linanggam nga mga sampit
sa mga gabatog sa katas-an.
Kini, ako na lang
hinumduman.
Ako, usahay, makahilak
nga hinumduman ko na lang
ug basin di na makita
ang iyang pagkaduol
sa dalag nga yutang anapog, ug sa
wa’y tatsang yamog sa kabuntagon
nga gatapot sa mga dahong
gayuko, ingon ug sama nako
nga gakatulog ug wa’
pa kamata—pilit pang mupiyong sa
kamatuorang di’ na to nako mabalik.
Kato, ako na lang
damgohon.
