?????????????

by Nikole Elli | February 12, 2021

Sa simpleng dampi ng mga labi,
Kiliti’t kalabit sa balat,
Isa-isang nababasag ang hapo ng
Puso’t kaluluwa.

Ang bawat duda na dulot ng katwirang
Di magkatugma-tugma,
Ay naghihilom sa simpleng halik
Ng mga labi’ng uhaw at sabik.

Nasisindihang muli ang pusong sawi,
Ginigising ang diwa sa samyo ng kilig,
At ang mga tinitimping tampo
Ay natutupok, nalulusaw at nagiging abo.

Namamaga’t nagliliyab
Ang dibdib na kay tagal
Nang naghihintay sa
Pangako mong pagdating.

Hinay-hinay,
Nasusunog sa init
Ang katawang
Nilalamon ng iyong bisig.

Nalulusaw ang diwa’t kaluluwa
Sa halinghing ng kasiping,
Kalakip na ang habili’ng
Bukas ika’y mamahalin pa rin.