ni Lea Katrina Canizares | Disyembre 9, 2022
Sa dalampasigan, kiliti ng haring-araw sa ‘king nakaarkong labi ang bumungad
Tinutunaw ang nanlalamig na puso dulot ng kanyang mga sinag.
Kagaanan habang nagpapaanod tungo sa katarikan ay aking naramdaman
Bagama’t ang mga paa’y nakatali sa libingan.
Nanatiling nakayapak sa mapipinong buhangin
At ninanais na marinig mula sa ‘yong dila ang awitin.
Subalit, tinatangay ng hangin ang mga liriko sa ‘king kamay
Iyon pala’y awit na ‘di pa kinakanta.
Pinagmamasdan ko ang maliit kong hakbang sa dalampasigan
Habang naglalaho ang luha ko sa ingay ng mga along nagpapalitan.
At ang lahat ng patak nito ay sumusulat ng maririkit na awit
Isang makabuluhang mensahe ng lumbay at pag-ibig.
Ang pag-ibig ay isang musikang binubuo ng dalawang pusong nagmamahalan.
Ang pag-ibig ay isang musikang nanatiling matatag kahit sa malamig na kalagayan
