Thursday, April 18, 2024

Paglaom sa Panaw

ni Emmarie May M. Bonganciso

Ang alibangbang wala nabalaka 
sa kung kanus-a siya makaguwa
sa haruhay sa iyang panimalay.  
 
Samtang ang mga bulak 
wala nagapugos og kapakapa aron mobuka,
wala napig-ot og hinulat sa ulan na mutungha. 
 
Mao 'sab ang mga langgam nga kanunay 
ang paglupad sa mga panganod 
apan sa pagkaon, wala kini nagalisod.

Busa isalig kanunay ang kinabuhing lumalabay,
sa Ginoong takos ang gugma, lalom ug balaanon
nga kanunay nag-ingon, "Dili kita pasagdan."
 
Gikan sa imong pagsaka ug paglubog 
sa mga pagpakyas ug pag-uswag
anaa sa Iyahang palad ang imong panaw. 
 
Dili kita magpabilin aning yutang gitindugan, 
sama sa alibangbang, sa bulak ug sa langgam
ug sa abog kita mobalik
nga dal-on paingon sa mga panganod!

LEAVE A REPLY

Please enter your comment!
Please enter your name here

Latest articles