by Junelie Anthony Velonta | January 22, 2021
nga sa ako na lang
hunahuna galutaw,
ang nabilin na lang nga tibuok
kay ang kawayan sa katig
nga gipatindog sa kilid—tinaguan
aron wala’y makakita,
wala’y makahinumdom,
wala’y makahilabot—
uban sa bugsay nga wala na’y
gamit, apan wala gihapon gigabok.
Ang lawas niini’ng nabilin
kay gihimo na’ng sugnod,
kung wala man naanod
sa kalagot sa hangin
ug pagdagko sa balod.
Apan, bisan nga ang nabilin
kay naabtan na sa kaguba
ug sa ganid nga kagabok, nagpabilin
ang pinintalan nga plywood
nga didto ang is’ka ngalan
nga dili sa iyahang pamilya,
asawa, anak man, o apo—
gapahinumdum
nga bisan kini igsulugnod na lamang,
nga bisan sa kang lolo’ng kamatayan,
ang pambot wala narehistro
sa iyahang pangalan.
